మందస్మిత స్ఫురిత ముగ్ధముఖారవింద
కందర్పకోటి శతసుందరదివ్యమూర్తిమ్ |
ఆతామ్రకోమల జటాఘటితేందులేఖ-
మాలోకయే వటతటీ నిలయం దయళుమ్ || 1 ||
కందళిత బోధముద్రం కైవల్యానంద సంవిదున్నిద్రమ్ |
కలయే కంచనరుద్రం కరుణారసపూరపూరిత సముద్రమ్ || 2 ||
ఓం జయ దేవ మహాదేవ జయ కారుణ్యవిగ్రహ |
జయ భూమిరుహావాస జయ వీరాసనస్థిత || 3 ||
జయ కుందేందు పాటీర పాండురాంగాగజపతే |
జయ విజ్ఞానముద్రాఽక్షమాలా వీణా లసత్కర || 4 ||
జయేతర కరన్యస్త పుస్తకాస్త రజస్తమః |
జయాపస్మార నిక్షిప్త దక్షపాద సరోరుహ || 5 ||
జయ శార్దూల చర్మైక పరిధాన లసత్కటే |
జయ మందస్మితోదార ముఖేందు స్ఫురితాకృతే || 6 ||
జయాంతేవాసినికరై-రావృతానందమందర |
జయ లీలాజితానంగ జయ మంగళ వైభవ || 7 ||
జయ తుంగపృథూరస్క జయ సంగీతలోలుప |
జయ గంగాధరాసంగ జయ శృంగారశేఖర || 8 ||
జయోత్సంగానుషంగార్య జయోత్తుంగ నగాలయ |
జయాపాంగైక నిర్దగ్ధ త్రిపురామరవల్లభ || 9 ||
జయ పింగ జటాజూట ఘటితేందు కరామర |
జయ జాతు ప్రపన్నార్తి ప్రపాటన పటూత్తమ || 10 ||
జయ విద్యోత్పలోల్లాసి నిశాకర పరావర |
జయావిద్యాంధతమస-ధ్వంసనోద్భాసి భాస్కర || 11 ||
జయ సంసృతి కాంతార కుఠారాసురసూదన |
జయ సంసార సావిత్ర తాపతాపిత పాదప || 12 ||
జయ దోషవిషాలీఢ మృతసంజీవనౌషధ |
జయ కర్తవ్య దావాగ్ని దగ్ధాంతర సుధాంబుధే || 13 ||
జయాసూయార్ణవామగ్న జనతారణ నావిక |
జయాహంతాక్షి రోగాణామతిలోక సుఖాంజన || 14 ||
జయాశావిషవల్లీనాం-మూలమాలానికృంతన |
జయాఘ తృణకూటానామమంద జ్వలితానల || 15 ||
జయ మాయామదేభశ్రీ విదారణ మృగోత్తమ |
జయ భక్త జనస్వాంత చంద్రకాంతైక చంద్రమాః || 16 ||
జయ సంత్యక్తసర్వాశ మునికోక దివాకర |
జయాచలసుతా-చారుముఖచంద్ర-చకోరక || 17 ||
జయాద్రికన్యకోత్తుంగ కుచాచల విహంగమ |
జయ హైమవతీ మంజు ముఖపంకజ బంభర || 18 ||
జయ కాత్యాయనీ స్నిగ్ధ చిత్తోత్పల సుధాకర |
జయాఖిల హృదాకాశ లసద్ద్యుమణిమండల || 19 ||
జయాసంగ సుఖోత్తుంగ సౌధక్రీడన భూమిప |
జయ సంవిత్సభాసీమ నటనోత్సుక నర్తక || 20 ||
జయానవధి బోధాబ్ధి కేళికౌతుక భూపతే |
జయ నిర్మల చిద్వ్యోమ్ని చారుద్యోతిత నీరద || 21 ||
జయానంద సదుద్యాన లీలాలోలుప కోకిల |
జయాగమ శిరోరణ్యవిహార వరకుంజర || 22 ||
జయ ప్రణవ మాణిక్య పంజరాంతశ్శుకాగ్రణీః |
జయ సర్వకలావార్ధి తుషార కరమండల || 23 ||
జయాణిమాదిభూతీనాం శరణ్యాఖిల పుణ్యభూః |
జయ స్వభావ భాసైవ విభాసిత జగత్త్రయ || 24 ||
జయ ఖాది ధరిత్ర్యంత జగజ్జన్మాదికారణ |
జయాశేష జగజ్జాల కలాకలనవర్జిత || 25 ||
జయ ముక్తజనప్రాప్య సత్యజ్ఞాన సుఖాకృతే |
జయ దక్షాధ్వరధ్వంసిన్ జయ మోక్షఫలప్రద || 26 ||
జయ సూక్ష్మ జగద్వ్యాపిన్ జయ సాక్షిన్ చిదాత్మక |
జయ సర్పకులాకల్ప జయానల్ప గుణార్ణవ || 27 ||
జయ కందర్పలావణ్య దర్పనిర్భేదన ప్రభో |
జయ కర్పూరగౌరాంగ జయ కర్మఫలాశ్రయ || 28 ||
జయ కంజదళోత్సేక-భంజనోద్యతలోచన |
జయ పూర్ణేందుసౌందర్య గర్వనిర్వాపణానన || 29 ||
జయ హాస శ్రియోదస్త శరచ్చంద్ర మహాప్రభ |
జయాధర వినిర్భిన్న బింబారుణిమ విభ్రమ || 30 ||
జయ కంబు విలాసశ్రీ ధిక్కారి వరకంధర |
జయ మంజులమంజీరరంజిత శ్రీపదాంబుజ || 31 ||
జయ వైకుంఠసంపూజ్య జయాకుంఠమతే హర |
జయ శ్రీకంఠ సర్వజ్ఞ జయ సర్వకళానిధే || 32 ||
జయ కోశాతిదూరస్థ జయాకాశశిరోరుహ |
జయ పాశుపతధ్యేయ జయ పాశవిమోచక || 33 ||
జయ దేశిక దేవేశ జయ శంభో జగన్మయ |
జయ శర్వ శివేశాన జయ శంకర శాశ్వత || 34 ||
జయోంకారైకసంసిద్ధ జయ కింకరవత్సల |
జయ పంకజ జన్మాది భావితాంఘ్రియుగాంబుజ || 35 ||
జయ భర్గ భవ స్థాణో జయ భస్మావకుంఠన |
జయ స్తిమిత గంభీర జయ నిస్తులవిక్రమ || 36 ||
జయాస్తమితసర్వాశ జయోదస్తారిమండల |
జయ మార్తాండసోమాగ్ని-లోచనత్రయ మండిత || 37 ||
జయ గండస్థలాదర్శ బింబితోద్భాసికుండల |
జయ పాషండజనతా దండనైకపరాయణ || 38 ||
జయాఖండితసౌభాగ్య జయ చండీశభావిత |
జయానంతాంత కాంతైక జయ శాంతజనేడిత || 39 ||
జయ త్రయ్యంత సంవేద్య జయాంగ త్రితయాతిగ |
జయ నిర్భేదబోధాత్మన్ జయ నిర్భావభావిత || 40 ||
జయ నిర్ద్వంద్వ నిర్దోష జయాద్వైతసుఖాంబుధే |
జయ నిత్యనిరాధార జయ నిష్కళ నిర్గుణ || 41 ||
జయ నిష్క్రియ నిర్మాయ జయ నిర్మల నిర్భయ |
జయ నిశ్శబ్ద నిస్స్పర్శ జయ నీరూప నిర్మల || 42 ||
జయ నీరస నిర్గంధ జయ నిస్పృహ నిశ్చల |
జయ నిస్సీమ భూమాత్మన్ జయ నిష్పంద నీరధే || 43 ||
జయాచ్యుత జయాతర్క్య జయానన్య జయావ్యయ |
జయామూర్త జయాచింత్య జయాగ్రాహ్య జయాద్భుత || 44 ||
ఇతి శ్రీ దేశికేంద్రస్య స్తోత్రం పరమపావనమ్ |
పుత్రపౌత్త్రాయురారోగ్య-సర్వసౌభాగ్యవర్ధనమ్ || 45 ||
సర్వవిద్యాప్రదం సమ్యగపవర్గవిధాయకమ్ |
యః పఠేత్ప్రయతో భూత్వా ససర్వఫలమశ్నుతే || 46 ||
దాక్షాయణీపతి దయార్ద్ర నిరీక్షణేన
సాక్షాదవైతి పరతత్వమిహైవధీరః |
న స్నాన దాన జప హోమ సురార్చనాది-
ధర్మైరశేషనిగమాన్త నిరూపణైర్వా || 47 ||
అవచనచిన్ముద్రాభ్యామద్వైతం బోధమాత్రమాత్మానమ్ |
బ్రూతే తత్ర చ మానం పుస్తక భుజగాగ్నిభిర్మహాదేవః || 48 ||
కటిఘటిత కరటికృత్తిః కామపి ముద్రాం ప్రదర్శయన్ జటిలః |
స్వాలోకినః కపాలీ హంతమనోవిలయమాతనోత్యేకః || 49 ||
శ్రుతిముఖచంద్రచకోరం నతజనదౌరాత్మ్యదుర్గమకుఠారమ్ |
మునిమానససంచారం మనసా ప్రణతోఽస్మి దేశికముదారమ్ || 50 ||
ఇతి శ్రీపరమహంస పరివ్రాజకాచార్యవర్య శ్రీసదాశివ బ్రహ్మేంద్రవిరచితం శ్రీ దక్షిణామూర్తి స్తోత్రమ్ |
